Xestionar grandes fluxos de persoas é un dos retos aos que se enfrontan os núcleos de transporte urbano de calquera gran cidade. Grazas aos créditos e axudas que se enmarcan no Plan de Recuperación, Transformación e Resiliencia Next Generation, Renfe Viajeros está afrontando este problema a través da implementación de controis de acceso intelixente en estacións de Cercanías. O proxecto está dotado con 13,2 millóns de euros.

Os novos sistemas de control permitirán facilitar o tránsito polas estacións, minimizar o tempo de acceso e a obtención de billetes, e ademais poderanse detectar aglomeracións por enriba dos estándares admitidos, de forma que poderán tomarse decisións en tempo real e reconducir os fluxos de viaxeiros, mesmo modificando a planificación da frecuencia do paso de trens.

No contexto da dixitalización, Renfe adxudicou o contrato para a subministración, instalación e mantemento de pantallas multimedia, por un importe de 19,2 millóns de euros, así mesmo financiado polos fondos Next Generation. O seu obxectivo é substituír a información en papel das estacións por pantallas, polo que estará sempre actualizada e poderase personalizar para cada estación.

Na mesma liña o Renfe Smart Security Station (RS3), que conta cun orzamento de 31,7 millóns de euros dos fondos Next Generation, para a implementación de sistemas de intelixencia artificial aos equipos de vixilancia de preto de 500 estacións.

Este proxecto comezou a finais do ano pasado e está previsto que culmine en 2024. Durante este tempo substituiranse máis de 5.000 cámaras de seguridade analóxicas por cámaras IP, que permitirán compartir a información recollida a través do sistema CCTV nun sistema de videoanalítica integrado.